Okkar áhrif

525 konur hafa notið góðs af

Verkefni Lífgrasa hófst í mars 2023 og Anna Rósa er þegar búin að heimsækja Írak tvisvar. Eman, kúrdískur starfsmaður Lífgrasa og nemi í grasalækningum, kennir námskeiðin á milli heimsókna Önnu Rósu en 525 konur hafa sótt námskeiðin okkar 2023. Skoðanakönnun um námskeiðin sýndi að á skalanum 1-10 var ánægjan hjá konunum 8.2 og yfirgnæfandi meirihluti vildi læra meira um lækningajurtir.

Við höfum útdeilt 540 vörum

Við höfum framleitt og útdeilt 540 vörum úr jurtum 2023. Námskeiðin eru byggð upp á vali kvennanna sjálfra og þeirra þörfum og þær taka vörurnar með sér heim. Sem dæmi kennum við að búa til vörur fyrir verki og brunasár sem mikil þörf er á. Að auki höfum við gefið óteljandi bolla af jurtatei og búið til te uppskriftir gegn allskonar kvillum. Nú þegar hafa margar konur látið okkur vita að að vörurnar hafi hjálpað þeim með ýmsa kvilla.

Sumar vilja stofna fyrirtæki

Tilgangur þessa verkefnis er að sumar kvennanna stofni fyrirtæki og framleiði jurtavörur til að afla sér tekna. Nú þegar hafa fimm konur í þremur búðum sýnt áhuga á því að framleiða jurtavörur. Innlendu góðgerðarsamtökin sem við störfum með bjóða upp á námskeið í að stofna og reka fyrirtæki og Anna Rósa mun einnig ráðleggja með góða framleiðsluhætti.

Sumar eru þegar farnar að læra meira

Þær konur í flóttamannabúðunum sem hafa áhuga fá handleiðslu frá virtum skóla í grasalækningum sem við erum í samstarfi við. Nú þegar eru fimm konur skráðar og byrjaðar að læra meira um jurtir.

Æðislegt námskeið

Bahar Mirza býr í Essyan flóttamannabúðunum í Kúrdistan. Hún er 47 ára gömul og er frá Sinjar héraðinu í Írak en þurfti að flýja með fjölskyldu sína þegar ISIS gerðu innrás 2014. Hún eyðir dögunum í heimilisverk og hugsar um nokkrar kindur sem hún á. Bahar hafði þetta um smyrslanámskeiðið hjá Önnu Rósu að segja: “Mér fannst það algjörlega frábært, þetta var alveg ný upplifun fyrir mig, mér fannst allt námskeiðið æðislegt. Svo fannst mér líka dásamlegt að fá að eiga smyrslið sem við bjuggum til en ég elska þetta smyrsl.”

Konurnar á námskeiðunum

Hjörtum manna svipar saman í Súdan og Grímsnesinu, orti Tómas Guðmundsson. Önnu Rósu finnst ekki mikill munur að kenna konum að búa til smyrsl á Íslandi eða í flóttamannabúðum í Kúrdistan. Sami áhuginn og sama gleðin.

The Lotus Flower

Við hefðum engin áhrif ef við værum ekki í samstarfi við The Lotus Flower samtökin. Starfsfólk þeirra gerir þetta verkefni að veruleika með einstakri hjálpsemi. Fjöldi manna hefur lagt hönd á plóg. Hér sjáið þið nokkrar hjálpahellur.