Hvernig kviknaði hugmyndin?

Þegar Anna Rósa fékk þá hugmynd að fara að kenna konum í flóttamannbúðum um grasalækningar þorði hún ekki að segja nokkrum manni frá því. Það væri alveg galið að ætla sér að fara til ókunnugs lands að gera þetta með ekki nokkur einustu tengsl. Hlustaðu á hana hér fyrir neðan ef þú vilt vita meira um þetta verkefni.

Þú getur líka kíkt á örstutta heimildarmynd um Önnu Rósu og hennar vinnu sem grasalæknir.

Fyrsta ferðin til Kúrdistan Írak

2023

Í mars fór Anna Rósa í fyrsta skipti til Duhok í Kúrdistan Írak. Þá stofnaði hún verkefnið Herbal Sisters í samstarfi við þarlend góðgerðarsamtök The Lotus Flower og kenndi konum í þremum flóttamannabúðum að búa til smyrsl. 

Samtökin Lífgrös stofnuð

2023

Góðgerðarsamtökin Lífgrös voru stofnuð þann 11. júní 2023 af Önnu Rósu Róbertsdóttur, Hjörleifi Sveinbjörnssyni og Ingibjörgu Birnu Ólafsdóttur. 

Önnur ferð til Kúrdistan Írak

2023

Anna Rósa eyddi mánuði í haust við að kenna námskeið í þremur flóttamannabúðum. 525 konur hafa sótt námskeiðin okkar 2023 og við höfum útdeilt 540 vörum úr jurtum. Námskeiðin eru byggð upp á vali kvennanna sjálfra og þeirra þörfum og sem dæmi kennum við að búa til vörur fyrir verki og brunasár sem mikil þörf er á. Eman var ráðin sem kúrdískur starfsmaður Lífgrasa en hún kennir námskeiðin á milli heimsókna Önnu Rósu og er einnig nemi í grasalækningum. Við höfum að auki ráðið Bashar sem bílstjóra til að keyra Eman í flóttamannabúðirnar. Það eru engar almenningssamgöngur í Írak, vegirnir eru ekki öruggir og bílslys eru tíð og því er nauðsynlegt að hafa reyndan bílstjóra.

Um Önnu Rósu

Anna Rósa stundaði nám í grasalækninum í 4 ár í Bretlandi. Hún hefur rekið eigin ráðgjöf og kennt um lækningamátt íslenskra jurta í yfir 30 ár ásamt því að gefa út vinsæla bók og vefnámskeið um íslenskar lækningajurtir. Hún framleiðir yfir 100 vörur í höndunum og tínir allar jurtirnar sjálf í íslenskri náttúru. Hún lætur hluta af hagnaði allra vara renna til Lífgrasa.