Hvernig byrjaði þetta?

Þegar Anna Rósa fékk þá hugmynd að fara að kenna konum í flóttamannbúðum um grasalækningar þorði hún ekki að segja nokkrum manni frá því. Það væri alveg galið að ætla sér að fara til ókunnugs lands að gera þetta með ekki nokkur einustu tengsl. Síðan þá hefur mikið vatn runnið til sjávar.

Fyrsta ferðin til Kúrdistan Írak

2023

Í mars fór Anna Rósa í fyrsta skipti til Duhok í Kúrdistan Írak. Þá stofnaði hún verkefnið Herbal Sisters í samstarfi við þarlend góðgerðarsamtök The Lotus Flower og kenndi konum í þremum flóttamannabúðum að búa til smyrsl. 

Samtökin Lífgrös stofnuð

2023

Góðgerðarsamtökin Lífgrös voru stofnuð þann 11. júní 2023 af Önnu Rósu Róbertsdóttur, Hjörleifi Sveinbjörnssyni og Ingibjörgu Birnu Ólafsdóttur. 

Önnur ferð til Kúrdistan Írak

2023

Í september dvaldi Anna Rósa í mánuði í Kúrdistan og kenndi námskeið í þremur flóttamannabúðum. 652 konur sóttu námskeiðin 2023-2024 og við útdeildum 687 vörum úr jurtum. Námskeiðin eru byggð upp á vali kvennanna sjálfra og þeirra þörfum og sem dæmi kenndum við að búa til vörur fyrir verki og brunasár sem mikil þörf var á. Eman var ráðin sem kúrdískur starfsmaður Lífgrasa en hún kenndi námskeiðin á milli heimsókna Önnu Rósu og var einnig nemi í grasalækningum. Við réðum að auki Bashar sem bílstjóra til að keyra Eman í flóttamannabúðirnar. Það eru engar almenningssamgöngur í Írak, vegirnir eru ekki öruggir og bílslys eru tíð og því var nauðsynlegt að hafa reyndan bílstjóra.

Verkefnið í Kúrdistan stöðvað

2024

Stjórnvöld í Kúrdistan stöðvuðu þetta verkefni eftir 12 mánuði á þeim forsendum að það væri of hættulegt að kenna ómenntuðum flóttakonum að gera smyrsl og jurtate úr kamillu. Þær gætu mögulega farið sér að voða með þessháttar þekkingu. Við erum enn að leita leiða til að halda áfram með þessi námskeið.

Verkefni í Úganda

2024

Um sumarið fór Anna Rósa í heimsókn til Úganda í boði Flóttamannastofnun Sameinuðu þjóðanna til að kynna sér aðstæður í flóttamannabúðum og hélt tvö námskeið fyrir flóttakonur til að kanna áhuga þeirra. Áhuginn reyndist vera mjög mikill en 56 konur sóttu námskeiðin. Ákveðið var að Lífgrös myndi reka verkefni í samstarfi við Flóttamannastofnunina og stefnt er að því að Anna Rósa fari næstu ferð í byrjun árs 2025.

Um Önnu Rósu

Anna Rósa stundaði nám í grasalækninum í 4 ár í Bretlandi. Hún hefur rekið eigin ráðgjöf og kennt um lækningamátt íslenskra jurta í yfir 30 ár ásamt því að gefa út vinsæla bók og vefnámskeið um íslenskar lækningajurtir. Hún framleiðir yfir 100 vörur í höndunum og tínir allar jurtirnar sjálf í íslenskri náttúru. Hún lætur hluta af hagnaði allra vara renna til Lífgrasa.

Hér getur þú kíkt á örstutta heimildarmynd um Önnu Rósu og hennar vinnu sem grasalæknir.