Verkefnið í Kúrdistan Írak

652 konur nutu góðs af

Verkefnið í Kúrdistan Írak var í 12 mánuði 2023-2024 og sóttu 652 konur námskeiðin okkar. Anna Rósa heimsótti Írak tvisvar en Eman, kúrdískur starfsmaður okkar og nemi í grasalækningum, kenndi námskeiðin á milli heimsókna Önnu Rósu. Skoðanakönnun um námskeiðin sýndi að á skalanum 1-10 var ánægjan hjá konunum 8.2 og yfirgnæfandi meirihluti vildi læra meira um lækningajurtir.

Við útdeildum 687 vörum

Við framleiddum og útdeildum 687 vörum úr jurtum. Námskeiðin voru byggð upp á vali kvennanna sjálfra og þeirra þörfum og þær tóku vörurnar með sér heim. Sem dæmi kenndum við að búa til vörur fyrir verki og brunasár sem mikil þörf var á. Að auki gáfum við óteljandi bolla af jurtatei og bjuggum til te uppskriftir gegn allskonar kvillum. Fjölmargar konur létu okkur vita að að vörurnar hefðu hjálpað þeim með ýmsa kvilla.

Verkefninu lauk 2024

Stjórnvöld í Kúrdistan stöðvuðu verkefnið 2024. Það var gert á þeim forsendum að það væri of hætttulegt að kenna ómenntuðum flóttakonum að búa til smyrsl og te úr kamillu. Þær gætu mögulega farið sér að voða með þessháttar þekkingu. Við erum enn að leita leiða til að halda áfram með verkefnið.

Herbal Sisters

Verkefnið okkar í Kúrdistan var kallað Herbal Sisters og var samstarfsverkefni með The Lotus Flower samtökunum. Frá 2014 hafa þau starfrækt mörg árangursrík verkefni í flóttamannabúðum í Kúrdistan Írak. Starfsfólk hjá The Lotus Flower liðsinnti Önnu Rósu afar vel og fyrir það erum við ákaflega þakklát.

Æðislegt námskeið

Bahar Mirza býr í Essyan flóttamannabúðunum í Kúrdistan. Hún er 47 ára gömul og er frá Sinjar héraðinu í Írak en þurfti að flýja með fjölskyldu sína þegar ISIS gerðu innrás 2014. Hún eyðir dögunum í heimilisverk og hugsar um nokkrar kindur sem hún á. Bahar hafði þetta um smyrslanámskeiðið hjá Önnu Rósu að segja: “Mér fannst það algjörlega frábært, þetta var alveg ný upplifun fyrir mig, mér fannst allt námskeiðið æðislegt. Svo fannst mér líka dásamlegt að fá að eiga smyrslið sem við bjuggum til en ég elska þetta smyrsl.”

Konurnar á námskeiðunum

Hjörtum manna svipar saman í Súdan og Grímsnesinu, orti Tómas Guðmundsson. Önnu Rósu fannst ekki mikill munur að kenna konum að búa til smyrsl á Íslandi eða í flóttamannabúðum í Kúrdistan. Sami áhuginn og sama gleðin.

The Lotus Flower

Við hefðum engin áhrif haft án samstarfs við The Lotus Flower samtökin. Starfsfólk þeirra gerði þetta verkefni að veruleika með einstakri hjálpsemi. Fjöldi manna lagði hönd á plóg. Hér sjáið þið nokkrar hjálpahellur.