Í Dukhok-héraði í Kúrdistan Írak þar sem Anna Rósa grasalæknir vinnur í sjálfboðavinnu fyrir Lífgrös eru starfræktar tuttugu flóttamannbúðir. Í búðunum er neyð kvenna mest en ofbeldi gagnvart þeim er viðvarandi vandamál.

Duhok-hérað í Kúrdistan Írak hefur ekki farið varhluta af viðvarandi stríðsátökum og óöld í landinu. Sextán flóttamannabúðuir eru starfræktar, aðeins í þessu eina héraði, fyrir karla konur og börn á flótta innanlands. Fjórar til viðbótar fyrir sýrlenska flóttamenn en í maílok í ár voru þeir ríflega 83.500 talsins.

Í Kúrdistan Írak eru 38% sýrlenskra flóttamanna í níu flóttamannabúðum, en af þeim eru fjórar í Duhok. Fjöldi sýrlenskra flóttamanna jókst enn eftir hernaðaraðgerðir Tyrkja í norð-austur Sýrlandi í október 2019.

Samkvæmt nýlegu mati eru um 64.500 fjölskyldur fólks á flótta innanlands í Duhok-héraði. Mikill meirihluti eru Yezidar frá Sinjar-héraði. ISIS-liðar beittu þetta fólk sérstakri hörku og grimmd og það svo mjög að aðfarirnar falla undir skilgreiningu þjóðarmorðs. Sinjar-búar eru ófúsir að snúa til síns heima vegna viðvarandi þjóðfélagsóróa þar.

Með nýjum og nýjum átakasvæðum vítt og breitt um veröldina hefur athygli heimsins á búðunum farið minnkandi, þrátt fyrir að neyðin sé söm og jöfn. Staðaryfirvöld í Duhok-héraði hafa kappkostað að halda uppi þjónustu við flóttamenn, einkum frá Sýrlandi, og fólk á flótta innanlands, en standa því frammi fyrir auknum vanda en var hann þó ærinn fyrir. Mikið vantar upp á öryggi fólksins og einkalíf og einkum er ofbeldi gegn konum viðvarandi vandamál.